現屆立法會收爐在即，立法會「字典」卻出爐！由於唔少人對立法會嘅規矩、程序、運作都覺得好複雜，立法會於是出版《立法會歷史、規則及行事方式參考手冊》（圖），講解立會同各個委員會嘅運作方式！
呢本厚如字典嘅手冊由立法會前秘書長吳文華Pauline受立法會行政管理委員會之託，花3年半時間同300萬製作。手冊記錄咗今時今日議員喺財務委員會使用「無經預告議案」作為嘅拉布手法，係點樣走出嚟，成件事原來係要多得前立法會議員李鳳英？來龍去脈載於「字典」第13章。
Pauline話回歸前紀錄不全，為咗要搞呢本手冊，要託人喺英國查資料，退下火線嘅Pauline話，現時大會上有議員群情洶湧、紛紛起身，原來《議事規則》有講明，只有主席一企起身，所有議員都要坐番低，否則主席可以用「行為不檢」逐佢出會議廳，但曾鈺成一直冇用過。