九龍灣時昌迷你倉四級大火燒足108小時，令兩位消防員殉職，令人惋惜。大火過後，過百藝人錄歌向消防員致敬，結果俾網民批評佢哋抽水，連黃秋生都話佢哋最好捐埋錢。
原來秋生呢個諗法，黎明（Leon）都好認同，馮仁昭收到風，Leon原來好低調咁捐咗50萬去《蘋果慈善基金》，希望幫助兩位殉職消防員張耀升、許志傑遺屬，同埋日前青葵公路奪命車禍，2死1重傷嘅公路維修工人同遺屬。
報料人同馮仁昭講：「想將呢件事講出嚟，因為見到好多明星影相話向消防員致敬，覺得好唔實際，知道黎明原來做咗呢啲嘢，好想表揚吓佢！」馮仁昭打過電話搵Leon經理人公司問捐款嘅事，佢哋話冇回應喎！
個唱3萬包廂
另外，Leon下個月23同24日喺澳門新濠影匯開騷，門票今日公開發售，六種票價最貴係3,080元，最平係480元，仲有一種由30,000至35,000元不等嘅VIP包廂，可坐12人，歌迷今次搶飛要快手！
撰文：馮仁昭
