英國人講心不講金，公投決定退出歐盟，令包括左丁山在內嘅經濟理性派人士大跌眼鏡。據彭博報導，倫敦政治經濟學院內有大批經濟學教授徹夜不眠睇電視直播脫歐公投新聞，知道脫歐派穩勝之後，幾乎鴉雀無聲。英國103間大學校長曾聯署撐留歐，高級知識分子不斷發表文章支持留歐，結果統統敗在講直覺、講反移民、講英國第一、講反對全球化嘅工人階級及保守鄉紳村民等人手上，當然覺得好冇癮，紛紛在BBC訪問時，表示傷心痛心，為英國前途擔憂。
目前距離真正脫歐還有兩三年過渡時間，金馬倫雖然會盡量維持現時英國人與歐盟嘅旅行、工作條件不變，但卒之都係要變嘅啫，持英國護照嘅英國公民，或可繼續免簽證到歐洲旅行，但在歐盟國家長居或工作呢？於法理不合噃，必須似亞洲人、非洲人咁樣申請工作證、居留證，倫敦國際金融中心內之歐盟銀行家、僱員，須申請英國工作證，英超球會內之所有歐盟球員，亦是如此。為逃避高稅率而移居倫敦嘅法國人，唔通要申請入籍英國？凡此種種，必會消耗大量有關人士與官僚嘅精神時間，非常不方便。
英國經濟雖然發展得唔錯，金融市場更是歐盟重鎮，但脫歐後便成為孤島，要重新談判自由貿易市場條件，而歐盟內農民勢力好大，除英國農民再不能得到歐盟農業津貼外，英國農產品以後要輸往歐盟，必然遇上不少保護主義障礙。呢啲事情，投票前已經知得好清楚，但52%英國選民一於唔聽，係要脫歐，當然有佢地嘅自由，但跨國公司財團亦有佢地嘅自由，因為歐盟市場大過英國市場，外國投資者從英國撤資搬廠去愛爾蘭共和國，好合經濟邏輯啫，如果因此而引致英國工人失業率上升，脫歐派冇得怨天尤人。英國除咗北海油田之外，已冇乜天然資源，金融業係一大經濟支持，但倫敦之重要性，在乎其完全對外開放，擁抱全球化，憑普通法制度吸引全球資金人才匯聚倫敦；英國脫歐後，巴黎與法蘭克福會有「吾可取而代之也」嘅慾望起來同倫敦爭一爭，JP摩根事先已預告英國分行在脫歐後便會裁員，其他銀行亦有同樣動作，勢必影響倫敦之金融地位。脫歐選民要講心不講金，係有原則嘅表現，之不過有一個前設，就係食得鹹魚抵得渴，以後不要罵人無良心、冇義氣，投票脫歐之一千七百幾萬英國人，要頂硬上捱吓辛苦，先至算得係真君子。