「許多旁人說我不太明瞭男孩子，不受命令就是一種最壞名字，笑我這個毫無辦法管束的野孩子……」
楊千嬅首《野孩子》大家耳熟能詳，而她家族的愛駒「野孩子」亦都馬如其名真係幾野性，有心機跑之時，可以好似上年2月咁大勝而回，一但冇乜mood心情差，就如上場搞到起步漏閘，大敗而回。不過「野孩子」周五(7月1日)出賽，將首次配人氣騎師蔣嘉琦，由個女將施展柔功，以柔制剛，唔會好似男騎師咁硬碰硬，隨時回復好演出。
睇番嘉琦BB同娛樂圈人士都好有緣，曾替洪金寶愛駒「崇山寶」跑第三，係隻馬季內表現最佳一仗。另外日前巨聲幫歌手陳國峰拖實老婆阿Wing入場，為嘉琦的「心花怒放」打氣，結果隻馬亦順利勝出。而女士組合Super Girls成員Aka趙慧珊，更喺馬場內搵嘉琦集郵合照，可見呢位琦女子真係魅力沒法擋。
講番「野孩子」，今仗降班對手減弱，跑番贏過的沙田1000米，排直路賽有利之12檔，都係有利條件，千嬅能否同老公丁子高一齊拉頭馬，就要睇嘉琦你啦！