「糖兩茶匙，仲有啲橙皮添‧‧‧」各位女士為貪靚而敷上面嘅嘢，種類應該仲多過香港嘅電視節目。D.I.Y食物面膜有好多種，但並非每款敷上去都有好效果，今次就同大家拆解4款常見的天然面膜！
一、牛奶+番茄=亮白？
牛奶白雪雪，而番茄含豐富維他命A，有抗氧化功效，坊間認為將兩者混合敷上面，可以令皮膚更亮白，似係沖咗個抗氧化嘅牛奶浴，之但係註冊中醫師楊明霞指出，「外敷的話，主要是補充角質層的水份，但只在剎那間」，因為齋外敷唔能夠真正滲透入肌膚，不過內服反而有幫助，皆因「番茄的維他命A和牛奶豐富的蛋白質，對皮膚細胞是好的。」
二、檸檬汁+蛋白=去黑頭？
網上流傳，用檸檬汁加蛋白敷上鼻頭同T字位等容易積聚黑頭嘅部位，等蛋白乾後可以成塊蛋白撕下，清除面上黑頭，點知楊醫師話「呢個就冇醫學根據，現代醫學也沒有提及過。」佢仲提醒，檸檬汁外敷的話要小心，其高鹼性容易刺激皮膚，有機會令皮膚敏感。不過檸檬汁亦蘊含豐富維他命C，內服的確有助美白，但由於佢光敏性高，喺陽光猛烈嘅情況下飲會更容易曬黑，大家要留意！
三、咖啡+蜜糖=緊緻？
咖啡中嘅咖啡因可以提高身體基礎代謝同抗老化，加埋蜜糖聽落夠晒滋潤，但原來搽幾多都唔會直接令皮膚更緊緻！皆因要刺激到皮膚真皮層，先可以重組膠原纖維同彈性纖維，但真皮層之上嘅表皮層起保護作用，會令外來嘅東西冇咁容易入侵皮膚細胞，單係敷面膜未必滲透到真皮層，所以醫師話「呢兩個食材不會有直接作用。」
四、乳酪+麥片=深層清潔？
黑頭、粉刺都係收埋喺毛孔嘅污垢，用磨砂來清潔就試得多，用砂糖或麥片嘅原理，都係借佢嘅粗糙質地來刺激毛囊，軟化污垢再帶走毛孔入面嘅廢物。用乳酪加麥片好似有機又make sense，但楊醫師就指出，「面部皮膚就如瓷器，如果用沙布來擦瓷器，好容易磨花，同樣情況，皮膚角質層如果用太多外來物理性磨擦，會令它更為敏感，不建議使用。」
記者：黃樂雯