早前揚言考慮退黨參選立法會嘅鍾樹根，去向備受網民關注，Tree根昨預告，暫定今日下午3點喺立法會開記招公佈去向，屆時佢嘅fb會直播。
有眼利人士發現，Tree根喺fb上載一張疑似競選照片（圖），竟然打咗民記logo嘅呔，莫非佢決定屈服排喺「企鵝男」張國鈞名單第二？Tree根被問到此事時話記者「好犀利」，聲稱張相係舊相、條呔只係「求其打」喎！
當被追問係咪排第二？佢話喎︰「我排第二？我排第六都得啦，有乜所謂吖！」問到佢嘅最新決定會令網民失望定開心？佢話：「我冇責任令佢哋開心㗎喎！」早前被民記踢走嘅「根毛毛」，原來亦準備回歸，Tree根話「根毛毛」未來只會兼職形式幫佢手。八方聽聞民記高層空群出動，𠱁掂Tree根為大局着想留低。