距離里約奧運開幕唔夠兩個月，香港羽毛球一班奧運代表進入倒數階段……講緊嘅係世界排名計分賽。佢哋噚日喺台北參加嘅中華台北羽毛球公開賽，係奧運前尾二一站。「90後」奧運男單代表、世界排名13嘅伍家朗早兩日搭飛機嗰陣升呢坐商務客位，忍唔住喺社交網站上載張相；佢噚日亦有好開始，連過兩關，首圈以2:1擊敗印度球手，次圈再以2:0贏馬來西亞球手，16強會對世界排名53位嘅中國球手喬斌；同日晉級嘅男將仲有黃永棋同魏楠。女雙拍檔吳芷柔/楊雅婷同混雙組合李晉熙/周凱華，首圈亦以2:0殺退東道主組合。