【本報訊】訪問在石永泰年過半百前一天進行，已屆「知天命」之年的他面對當下時政，自言懨悶無比，故此理解「荷爾蒙豐盛」的年輕人有多鬱悶，但他直言看到同學們將自身鬱悶無止境發洩，有時感到「把幾火」，甚至指有些人只為「搶點子、搶sound bite」，以「抗命」作免死金牌，性質卻與典型的公民抗命相距甚遠。資深大狀不諱言，有來自北方的壓力威脅香港法治，但有人以抗命為護身符，作出損害他人權利的事亦衝擊法治。
石永泰以恒基地產早前欲收回馬屎埔村農地向高院申請臨時禁制令獲批，及教院學生不滿城規會通過將大埔綠化地改為低密度住宅提司法覆核為例，指政府不可用法律打壓人民，同樣「當人民之間集體唔尊重法庭命令，亦都好危險。」石解釋，恒基依足程序向法庭申請禁制令，「你跟住話人打壓，咁唔單止係話恒基打壓喎，仲令人覺得法庭助紂為虐打壓你」；至於高院駁回教院學生的司法覆核，「我見到有環保人士喺facebook話『法治也沒有了』，呢啲咪係輸打贏要囉！」
被「鴇母龜公」論觸怒
石同時指，對一些學生領袖的行為不以為然，以今年六四為例：「無經歷過（六四）我可以了解，但𠵱家連基本嘅manners（禮貌）都冇……對悼念六四、對我哋呢一代香港人都用呢啲語言，仲有樹仁（大學）嗰班真係令人把幾火。」
除非不在港，六四維園內會有石的身影，難怪會被樹仁編委會批支聯會是鴇母龜公觸怒，同時看不過眼去年六四晚會學生代表台上燒《基本法》，認為與悼念六四本質無關，亦騎劫活動。港大學生會年初一旺角騷亂後發聲明指「永遠站在反抗者一方」，令他火滾兼反感：「你意思係咪做乜你都支持？真係即刻有人出來話抗爭冇底線喎。一句制度暴力逼出來，你可以掟磚，下一步係咩？淋火水得唔得？」他引述終審法官馬道立早前指，尊重法治亦是尊重每人權利，「唔好攞住公民抗命四字誤解法治」。
辦公室放着陳冠中的小說，石永泰有着他這一代人的「牢騷」：「黃之鋒同學14歲時光芒四射，四年之後大家睇佢由天堂跌落凡間，我諗佢都應該好有感觸。」他指社會對學生的包容源於相信他們會帶着年輕的這團火，進入社會不同領域，但社會對學生領袖的耐性明顯消減：「我嘅感覺係，有啲同學唔係真心去做，係為咗搶點子，恃住自己係同學……（旺角騷亂）亦有人借題發揮……呢個係一個感覺，你話我老屈你都係咁講。我可以講李波事件嘅感覺，我都有資格講當晚嘅感覺。」
■記者陳雪玲