最近有連鎖快餐店俾員工投訴，時不時要返「地獄更表」之餘，OT補水又畀唔足。咁啱噚日大快活（052）舉行業績會，當然要問主席羅開揚點睇。佢話，除非喺店內做大清潔，否則一向唔鼓勵員工加班，又強調按足時薪畀「投入津貼」，即係加班費咁解。
大快活舊年純利升近四成，表現咁好，羅開揚嘅心情就好似佢個名一樣，張揚地開心，仲有問必答㖭！
講到舊年底先開嘅日式概念餐廳，有人問佢會唔會學同業咁八足咁多爪，開多啲特色餐廳，佢好謙咁話，「專心做一、兩個brand，對公司發展仲好，我哋都冇咁多資源同能力喇」，仲加多句「經營得唔好，新嘢好快俾人忘記」，似乎有啲言外之意咁囉。
至於代言人杜汶澤俾內地封殺，驚唔驚會影響到公司，佢就話冇問題，仲話好欣賞對方夠真，杜汶澤份人好之餘，又夠開心，同公司形象非常夾咁話。