近日美欣與中學同學聚餐，談及近日地產市道，大家不禁記起五年前生果日報曾報道三位年賺過百萬的地產代理新人王，如何靠個人努力闖出事業艷陽天。
「當年阿媽話我不思進取，唔學班地產經紀咁賺大錢，我同佢講嗰行好多爛仔，食煙打交，唔幫襯佢哋仲要俾佢哋鬧。收入又唔穩定，要『好天斬埋落雨柴』，壓力唔係個個承受到，佢都唔肯聽。今日見個樓市差，代理流失率高，真係鬆口氣」聚餐一開始麗芬大講風涼話。「麗芬，相信你講嗰啲只係個別例子，上次幫我同子豪買樓個代理既專業又溫柔細心，不如介紹你識」美欣打圓場。
「地產代理靠佣金維生，要拼命跑數先可以留低，心態弱少少都唔掂。早前我和老公駕車去烏溪沙探親，就被人包圍架車兼狂拍玻璃窗，問我哋買唔買樓，諗起都覺得驚」佩儀雖心有餘悸，但慶幸老公擁有名車，令人以為自己買得起豪宅。「佩儀講得啱，地產代理真係個個都好似戰狼300，元朗新樓盤附近都有代理衝出馬路截車兜客。就算賺到大錢，我都絕對唔會畀男朋友做呢行！」淑娟間中都會睇新樓，最難忘係班地產代理搶生意個樣。
「總之咪淨係睇人哋點風光，做地產代理都係辛苦錢。食物到喇，大家飲杯喇，cheers！祝我哋友誼永固！」美欣叫大家舉杯，慶祝她們相識二十周年。
地產小子
http://www.propertykids.blogspot.hk
本欄逢周四刊出