立法會主席曾鈺成之前喺專欄大玩英文文字遊戲，被指攞梁特嚟講笑，其後佢自爆因為咁觸怒咗首長嘅「正義朋友」，曾鈺成噚日出席自己本新書《英語。人生 曾鈺成》發佈會（圖），八方問佢邊個係正義朋友，佢話「正義朋友」唔止一個，自己都聽到有啲意見，唔係咁喜歡呢啲玩法，但佢強調只係為過癮而寫，認為對方少咗啲幽默感，相信唔係首長本人嘅原意，又話社會應多啲輕鬆氣氛同幽默感。
曾主席之後大談政治領袖需要嘅4大特質，包括受歡迎、謙卑、具幽默感同人性化，唔好太在意自己嘅得失同面子，亦唔好當自己是神或者聖人，咁梁振英同曾俊華又符唔符合呢啲特點？佢就話自己唔適宜亦冇條件評論他人，因為呢啲特質連佢都未必能做得到，不過主席噚日係咁講領袖要有幽默感，唔知會唔會令人對號入座，又激嬲啲正義朋友呢？