科技發達，加上人人貪靚，整容已經十分普遍，主打女性至愛隆胸手術嘅診所同醫院更開到成行成市，遍佈全世界。但最近有傳，製造隆胸矽膠嘅公司竟然要炒人，唔通連隆胸材料業都受環球經濟影響？
據外電報道，美國化工巨頭杜氏化工因早前收購道康寧全部股份，所以要喺全球炒2,500人，佔總體員工人數約4%。
杜氏化工表示，今次架構重組，將會關閉日本與美國嘅矽膠廠。杜氏化工主席Andrew Liveris好例牌咁講，裁員重組係為客戶創造更高價值，為股東創造更大回報。
都明嘅，道康寧有72年歷史，1961年有份發明隆胸矽膠，咁好搵嘅生意唔重組炒人點賺更多，否則杜氏化工當年就唔會畀48億美元（374億港元）現金將道康寧由合資轉為全資擁有喇。