立法會選舉提名期7月16日開始，各大門派都已經準備就緒，摺起衫袖等住落場作戰。咦，之前籌組「新界進步聯盟黨」脫腳嘅上水鄉委會主席侯志強，雖則一直未有講明係咪會出征新界東，但見佢近來動作多多，例如頻頻落區送福袋，相信去馬之意極濃，一旦佢上陣，新東料有至少3位Gary大混戰！
吓，侯志強英文名叫Gary，大家唔知咩？其實佢嘅宣傳單張，都印有Gary呢個名，只係冇用此嚟行走江湖箒！而近日就出現咗一個以佢中、英名開嘅facebook專頁，po唔多，得兩張相，所以呃like成績麻麻。
但有心水清人士卻同八方講，侯強之前嘅英文名，好似叫Bowie，因乜解究無端端改咗名？又唔通，佢見到新東兩名現任議員民建聯陳克勤同新同盟范國威，都係叫Gary，覺得呢個名好意頭，可以有助入立法會，所以用埋一份，想選民支持埋佢呢個鄉事派Gary？
7.9有分曉
八方問過侯強嘞，佢話一直叫Gary，但以前做生意時啲鬼佬朋友叫佢小寶，「叫吓叫吓叫我Bowie。」對於新東出現3個Gary，佢都幾驚訝，呼籲選民驗明正貨。咁講係咪即係一定去馬？佢賣關子話7月9日會喺鄉議局搞「軍事演習」，「人少少」有300人到場，到時大家就知喎！但肯肯定《Running Man》嘅宋智孝，唔係心繫呢幾位Gary。
李八方
mailto:[email protected]