九龍灣迷你倉四級火令兩名消防員喪生，香港9個電子傳媒發起活動撐前線消防員，逾百藝人響應呼籲，手持寫上「向前線消防員致敬」的紙張拍照放上網，有網民抨擊藝人選擇性發聲，對何韻詩、銅鑼灣書局事件視若無睹！
一向對時事敢言的黃秋生，昨日跟余安安、楊淇等到灣仔出席莎士比亞喜劇《仲夏夜之夢》記者會，問到他有否影相致敬？秋生坦言：「我梗係冇，我用自己方法致敬，我有朋友係已故消防員同期同袍，自己做咗啲乜嘢唔會打鑼打鼓咁老套，佢哋係英雄。」原來秋生在fb貼捐款給已故消防員家屬的賬戶資料，留言：「人人為我，我為人人。請幫忙。向消防勇士致敬！」對於網民狠批演藝界抽水，秋生說：「乜嘢都有人講，最好捐埋錢，佢哋捐得起。佢哋都有心。」
唔似GaGa好人
對於美國樂壇巨星Lady GaGa高調跟達賴喇嘛會面，遭內地下令封殺，秋生說：「我都唔知佢有冇入到內地市場，而且佢啲歌我都唔聽，我都唔着透視裝嘅，我冇咁好人，唔會好似佢哋咁講博愛，我又殘忍又暴戾。」
另外，有份影相致敬的黃翠如，因拍照時露笑容被網友爆粗圍剿：「為何可以笑得出？」結果要刪po平息風波，翠如昨到尖沙嘴出席手機活動，坦言：「其實影呢張相原因，係希望畀多啲正面力量多謝消防員，至於刪除係因為有網民講粗口，有人留粗口覺得好心痛同難過，自己好怕。」
翠如唔使安慰
至於有網民批評藝人選擇性發聲，她說：「其實我都有留意網民反應，惟有當今次係全香港一條心去做一件事，希望今次係一個開始，香港人好愛香港。」問到男友蕭正楠有否安慰？她說：「佢知我好正面，唔需要安慰。」。
另由許冠傑、譚詠麟、張學友、陳奕迅、陳慧琳、李克勤、陳慧嫻、張智霖等逾50位歌手合唱《真的英雄》打氣MV，昨晚在各電視台首播，但YouTube片在網絡上一度中斷。
採訪：曹家誠、張俊銘
攝影：陳俊強、陳慧安