【科技籽：出閘搜新】
iPhone 7的規格由6s推出嗰日一路傳到𠵱家，近日驚爆話新機可能改動極少，要等下年iPhone十周年先來個大改革。不過果迷又唔使失望，事關於WWDC發佈的iOS 10和macOS有不少新功能，單係Siri開放已經可能改變大家使用手機嘅方法。我們找來app開發者和不同界別嘅果迷試玩iOS 10和macOS的開發者版本，論盡矚目新功能。
iOS 10和macOS的beta試用版本目前已可以給開發者用戶下載使用，大部份在WWDC發佈會談及的新功能已經可使用。今次iOS 10的滑鎖方式和通知中心大改，一拎起手機睇已好唔同。沒有了滑動解鎖，無論使用Touch ID指紋認證與否，都要按Home鍵來解鎖，用家可能會覺得不便，需要一點時間適應，不過綜合各位受訪者意見，iOS 10最大潛力都是解放Siri。
以往使用Siri，不難發覺要配合特定語法，例如「打電話給媽媽」、「打開Safari」等等，很多情況Siri都只會答你「我唔肯定我明唔明」或者「我喺網上搵到XXX」。iOS 10將會開放Siri給第三方app，當然仲要畀時間開發者設計，目前beta版試不到有app對應，但一眾開發者已躍躍欲試。本地洗衫app「Boni」創辦人Kelvin Lee認為Apple最終想做到iPhone可以全語音控制。「好似Boni咁，用戶要填姓名、地址、衣服數量等表格，日後或者Siri可以做到一問一答幫用家落單。」暫時示範影片中可以看到以Siri發送WeChat訊息或是以外國call車app「Lyft」叫車，實際點玩法，全靠第三方app開發者設計。
入侵家居生活 轉用其他手機唔容易
除了Siri，本地公司App Tech負責人Edmund Lee亦覺得iOS 10的新功能有種毒性，讓人難以轉會。例如Apple Pay不只好像八達通用NFC去「嘟」，還有網上版，日後上網買戲飛、預訂酒店不用輸入信用卡或是其他網上過數服務如PayPal等賬戶資料，用Touch ID 指紋一篤即可用信用卡付費，極為方便。另外新增的「Home」app對應多個電器品牌，一個app做晒所有電器遙控，Philips、海爾電器等旗下產品都會支援。Home不單作為萬能遙控器，還可以設定不同場景，例如定位感應到用戶回家途中就先開冷氣、燈和電視。「其實都有其他人做緊Smart Home，但除咗頭先講嘅太多唔同app，好多都要用家自己好似寫program咁設定，相信Apple會提供一個更簡單嘅方案，而當家居生活都靠iPhone，到時你就好難轉用其他手機。」
以上提到的Siri解放、Apple Pay、Home app全部都要靠其他品牌和app配合，如果多人撐，iOS 10毒性極強，試想想網上付款和智能家居全都用Apple服務，日後真的很難轉用其他品牌的手機。不過正因要多方配合，現在還未試到，一切還在紙上談兵階段，到底iOS 10這三大法寶能否革新智能手機玩法，還要時間證明。
macOS加Siri 文書工作更方便
手機要流動使用，雙手沒空時語音操作的確方便，Apple就認為手提電腦都同樣適用，在新的macOS加入Siri。網台節目Mactivity一眾主持試玩過，覺得Mac加Siri手口並用方便工作，例如用Siri搜尋圖片後，可以直接拖曳到Pages、Keynote等文書軟件插入圖片，做簡報甚為方便。可見Mac版Siri有實用性，並非為加而加。
連動剪貼功能 共用裝置會混亂
其他實用功能包括iPhone和iPad連動的copy and paste。當裝置共用相同WiFi和Apple ID，在手機上copy的文，在Mac上可直接paste，反之亦然，完全不需任何設定已能使用。不過Mac友們就擔心如果裝置是和家人共用會產生混亂，你用手機和Mac機工作，家人同時用iPad查資料，都不知誰在copy誰在paste，或者正式版應指明來源。Mac友們覺得這次更新加強了iPhone和Mac機的聯繫，例如新的iMessage功能，macOS大部份都支援。
記者：司徒港燊
攝影：徐振國
編輯：黃仲兒
美術：黃創泰