因藥檢肥佬而被罰停賽兩年嘅俄羅斯靚女網球手舒拉寶娃，周一喺社交網站話會去讀書，仲要係去哈佛商學院讀商科。29歲嘅舒娃上訴到體育仲裁法院，如果成功就唔使停賽，可以玩里奧，但佢近年因傷患問題而搞到成績麻麻，對上一次贏大滿貫女單冠軍已經要數到2014年法網，就算可以打番波都好難有突破，係時候要諗吓前途問題。查實佢早幾年搞咗個叫Sugarpova嘅糖果品牌，外界都估佢第日唔打網球之後會從商，所以佢去讀商科都係好正常嘅。