【決戰689】
【本報訊】特首梁振英2012年當選後，以外行領導內行，掌管逾16萬名公務員，公僕圈自此哀號不絕，有傳政務司司長林鄭月娥與傳媒高層聚會時，更曾以「對政府運作一竅不通」形容上司；曾領導公務員的王永平如此回顧過去4年的公務員士氣：「一個字，就係『傷』；如果用四個字，就係『慘不忍睹』，作為一個前任公務員事務局局長，就係痛心疾首。」
記者：姚國雄
梁班子無規無矩令公務員士氣低落，而最教王永平搖頭嘆息的，是公務員的政治中立史無前例受衝擊。王接受訪問時稱，公務員昔日「阿頭」被炒得不明不白，梁振英責無旁貸：「到今日都冇人知道，前任公務員事務局局長（鄧國威）點解俾人『炒魷魚』……呢個喺好多公務員心目中係好大嘅問號。」
踢走鄧國威 張雲正跳級
鄧國威去年7月「被炒魷」，王永平認為難以理解：「佢嘅工作理應不涉及政治，佢俾人炒魷魚時，令人聯想到啲乜呢？一係佢做咗啲嘢，令特首唔鍾意，但佢可以做啲乜，特首係唔鍾意嘅呢？係咪同佔中有關連呢？你對公務員事務局（局長）嘅要求，係咪要求政治要效忠呢？」
踢走了鄧國威，梁振英將只屬D6級（首長級第六級）的公務員張雲正「跳級」，騎在一眾D8級（首長級第八級）的常任秘書長頭上，王永平亦認為難以理解，質疑梁是要向一眾常秘擺姿態，「成班D8冇個適合（做局長）呀？你搵一個D6（官員）跳上去做公務員事務局局長，領導成班常任秘書長，係咪予人你唔尊重個制度嘅印象呢？你要越級升一個人（張雲正），要有一個理由，但我睇唔到有乜理由」。
政治衝突 警隊變磨心
說完鄧國威，王永平表示，佔公務員兩成人數的警隊，亦令他不無感嘆。他形容過去4年警隊的專業形象受到很大打擊：「以往（香港市民）引以為傲嘅警隊，喺市民、起碼喺好多市民心目中、唔係大部份，形象係差咗。」
王指，近幾年的政治衝突，令警隊變成磨心：「有政治訴求嘅人，會覺得你（警察）變咗做政治打壓工具，某程度上我同情警隊，佢哋盡忠職守。」他又認為有警員在大型群眾活動中情緒失控，「個別警員過咗火位，市民會認為你助紂為虐……喺執法上、檢控上，係咪真係保持中立專業，有冇偏頗，有冇政治考慮呢？」
梁振英做事作風被指強硬愛搞對抗，王永平形容梁的作風苦了公務員：「你（梁）下下要同立法會撐到咁行，負責某一個項目嘅公務員，咁就冇可避免受到牽連。」這些日子，還有1年，還是尚有6年？王永平說，若梁連任，真的不敢想像日後情況，「到時唔好講公務員團隊啦，係成個香港到時會點？」縱橫官場，見證董起曾來、曾落梁上，王永平敢說梁班子是歷屆最弱、質素最差：「你睇吓佢啲局長，有幾多個真係有專業知識去做份工作呢？我都費事開名。」
梁特膠句
「我會以身作則，帶領公務員同整個問責團隊，建立一個誠信、廉潔嘅政府。」
2012年3月
梁振英當選特首後發言
「特區政府同我本人都非常重視同立法會各個黨派所有議員嘅關係，所以大家睇到過去兩年，事實上過去嘅特首都係咁樣，當我們聽到任何批評嘅時候，我們基本上係唔還口嘅，甚至乎西方民主國家做政府嘅都唔一定係咁樣，我們都係虛心咁聽各個方面意見。」
2014年11月
梁振英回應田北俊
被褫奪政協職銜