中環又有新商廈改名！話說花旗香港之前斥資54億元，買入觀塘海濱道One Bay East東座成幢大樓做新office，有成幢樓做office，部份部門可以搬離𠵱家租開嘅中環「花旗銀行廣場」，大廈跟住改名都好正常。
業主冠君產業信託（2778）噚日公佈，項目將改名為「花園道三號」，其中一座「花旗銀行大廈」，改名為「冠君大廈」，另一座「工商銀行大廈」嘅名稱維持不變。
花旗雖然會使用自己新嘅「花旗大樓」，據講仍然租用花園道三號約22萬呎地方，以後仲可以省下一筆命名權費㖭。
冠君副行政總裁王家琦之前講過，以前個名實在好難令人諗到冠君係業主，希望改名後情況有改善；以往銀行租客佔整體六至七成，家陣就降到四成。