隔牆有耳：
逾千件經典麥記玩具重現 - 李八方

麥當勞叔叔、滑嘟嘟、小飛飛同漢堡神偷，係唔少大細路嘅童年回憶。麥當勞本周四起至下月17日期間，會喺太古城中心舉辦「麥當勞玩具樂園」，展出逾千件歷年極具代表性嘅麥當勞玩具精品，包括曾掀起搶購潮嘅史諾比世界之旅系列、Hello Kitty戀愛麥語、101斑點狗系列、麥當勞變形鐵甲人等。
現場亦會裝飾成昔日麥記餐廳，蘋果樹同火車頭卡位等重現眼前，麥當勞叔叔、滑嘟嘟、小飛飛同漢堡神偷亦會喺展覽期間嘅周六、日下午3點至4點快閃現身。

現場仲有QR碼遊戲，儲齊5款麥當勞樂園人物QR碼，就有換獎賞，6月30日至7月3日期間每日首100個完成遊戲嘅人，仲可以換優惠劵，用番當年價$4.8買漢堡包餐一份。