阿根廷美洲盃決賽又輸波，引發美斯、馬斯真蘭奴退隊，阿古路、迪馬利亞等主力都話退，阿根廷就估計係班球員極度不滿阿根廷足協，想藉退隊嚟逼宮，真係好睇過大台嘅宮廷劇；身在法國備戰歐國盃八強嘅葡萄牙球星基斯坦奴朗拿度（C朗），就喺佢社交網頁擺明向宿敵美斯挑戰。
葡萄牙驚險地加時淘汰克羅地亞，周四就要同波蘭爭四強席位，C朗周二就喺個人社交網頁上載做gym相，仲留言「No pain no gain」（沒有痛苦就沒有回報）。鼓勵吓自己原本都冇咩問題，不過佢啲死忠嘅留言，就吓吓插美斯，話C朗今季表現可人，金球獎十拿九穩，仲寸美斯表現只值世界第五，甚至低過蘇亞雷斯、羅拔利雲度夫斯基等球員㖭。寸還寸，美斯國際大賽零冠軍，其實C朗都一樣，如果今屆歐國盃又出局，隨時又會俾美斯死忠寸番轉頭㗎啦！
老馬開口挽留
講番美斯，佢宣佈退出國家隊，一石擊起千重浪，矛頭指向阿根廷足協，對國家隊待遇差，淨係識安排友賽搵錢；𠵱家連阿根廷總統馬克里同埋「球王」馬勒當拿，都出到聲挽留美斯，仲傳阿根廷足協因為頂唔住群情，足協主席施古亞會考慮下台，如果成功，相信美斯有機會回心轉意返國家隊。