英格蘭出局，話晒一場「兄弟」，你估威爾斯班球員有咩感受？當然係幸災樂禍啦！喺周一晚，艾朗藍斯（圖）等一班威爾斯球員喺酒店睇直播，當佢哋見到英格蘭出局後，個個彈晒起身歡呼，圍圈跳舞，嗰種興奮程度簡直令人以為佢哋慶祝自己贏波。又係嘅，威爾斯喺分組賽被英格蘭絕殺，可能大家條氣唔多順，家陣見到冰島踢走英軍，難免咁興奮！威爾斯已經打入八強，喺星期五對比利時。