呢幾日香港烈日似火，正帶領香港U21備戰下月新加坡四國足球邀請賽嘅港足熱血教練金判坤，噚日亦着埋火，眼見班小將練波唔戴護脛，操練態度又差，結果收操後「省」咗佢哋足足25分鐘。
斥小將唔戴護脛練波
剛決選咗29人嘅香港U21，噚朝喺港會場復操，雖然前一晚落過吓雨，但朝早氣溫超過攝氏35度，喺太陽直曬下，球員喺仿真草場練習個個大汗叠細汗。足總準備咗大量凍水同冰袋畀球員降溫，佢哋操咗接近兩個鐘後，竟然俾金判坤捉咗去觀眾席訓話。事緣兩星期前金帥已經同球員講，操練必須戴護脛，點知噚日超過半數球員冇按規定，向來對球員有要求嘅金帥收操後就向呢班小將訓話：「球員唔戴護脛練波係好唔專業嘅表現，如果因為冇護脛而受傷，就冇人幫到你哋。」
除咗批評小將冇聽指示外，金帥之後仲話呢班港隊未來希望嘅技術同意識都要改善，踢分隊賽嗰陣各自為戰，部份年紀大（95年出世）同已經踢緊港超球會嘅，操練態度差，做唔到榜樣之餘，又欠缺領導能力同承擔，叫佢哋好自為之喎。金判坤之後話：「理解到唔係所有球員都有領導才能，亦要經培訓先可能會有，但年紀較大嘅球員應該知道要做好榜樣，如果做大嘅係咁，細嘅會有樣學樣，咁就有好多問題。」金帥補充，喺香港教波多年，覺得香港球員比較怕喺場上爭取表現，又成日驚做錯，未能將自己應有水平發揮出嚟，呢啲心理問題都影響球隊發揮。
今次新加坡四國賽，香港U21會同伊朗、烏茲別克及新加坡切磋，對手實力都好強。港隊下月中會決選20人出戰，出發前希望至少踢一場熱身賽。