弊傢伙！阿曾玩大咗？每周一文玩謝特首梁振英嘅立法會主席曾鈺成，最近玩命玩火咁，搞到梁營嬲嬲豬？話說曾鈺成上周喺《am730》專欄以英文拼字遊戲anagram為例，開出「HUGELY CUNNING」謎題，謎底則係LEUNG CHUN YING，暗示對方好狡猾之後，佢噚日喺報章專欄話喎，「拿首長的名字來開玩笑」，「觸怒了（首長的）正義朋友」，表明絕無惡意嘅，但都唔能夠開脫冒犯首長之罪喎！
玩埋中共領導人
嗱嗱嗱，曾主席其實係冇講明，到底邊位首長嘅「正義朋友」被觸怒，只喺題為《瘋狂地獄》嘅文章繼續玩，寸爆話「保證內容不會對首長有任何不敬」，仲畀例子喎，例如領導長征嘅中共前主席毛澤東（Chairman Mao），變成I am on a march；領導改革開放嘅鄧小平Deng Xiaoping變成I go expanding，懶理「正義朋友」會否越睇越火滾。
至於坊間一眾花生友，就梗係齊齊估吓，邊位「正義朋友」會被觸怒？其中有3個人係大熱人選喎！網民首推新聞統籌專員馮煒光，覺得佢最護主心切㗎嘞喎，之但係佢層數咁低，就算被觸怒，都不值一提，相信高水平嘅阿曾都係咁諗啩？
咁係咪中央政策組首席顧問邵善波？確實呢，狂躁波係好勇鬥狠，仲鬧過建制派「搞搞震」，但佢呢排專注閂門以公帑做研究，尤其係疑似幫CY連任兼唔公佈嗰種，未必有時間去理坊間對梁嘅批評啩？噢，仲有一個人漏咗，點可以不提行會成員張志剛？不時寫文為梁振英護航喎，仲唔係佢？好可惜，大家唔係阿曾心裏嗰條蟲，答案只在曾鈺成心中。
李八方
mailto:[email protected]