威爾斯越戰越勇，殺入到八強，將會惡鬥比利時，或者連威爾斯球員都估唔到有咁好成績；效力雷丁嘅後衞基斯根達，原本預期下月七號飛去墨西哥，出席佢嘅兄弟馬克嘅婚禮，仲諗住會講賀詞㖭，不過四強大戰就係六號舉行，如果威爾斯晉級，基斯根達就出席唔到，佢話已準備好當日用Skype越洋演講，不過如果八強輸畀比利時，基斯就應該趕到婚禮。