一帶一路講咗咁耐，暫時都係得個講字。不過由金管局總裁陳德霖（Norman）搞嘅「基建融資促進辦公室」，就將於下周一成立，希望到時有多啲具體嘢出爐喇。
雖然話係「辦公室」，但聞說呢個基建辦只係金管局內嘅一個部門，人手上應該會有啲調配，唔知會係邊位主管調去幫手呢？
下周一嘅成立典禮上，金管局會同G20旗下全球基礎設施中心（GI Hub），仲有世界銀行旗下國際金融公司（IFC）簽訂諒解備忘錄，Norman當然出席，財爺鬍鬚曾都會發表主題演講。
基建辦嘅作用係匯集銀行、私募基金、資產管理公司等資金供應方，同埋一帶一路沿線國家代表，交流之餘亦探討合作機會，有幾實際？真係要等呢班用家分享先知。