白只同顏卓靈前日被讀者透過本報「爆相爆片」踢爆拍拖兼當街攬啜，晚上兩人分別喺facebook認愛，「白靈戀」噚日首度合體喺上環拍新片《今晚打喪屍》。白只honey張繼聰都在場，大合照時企正一對戀人中間，笑話：「你哋可以key走我！」
之後白只同顏卓靈都有大方合照，白只全程咪咪笑，搞到女友都忍唔住問佢笑乜嘢？白只話未試過有咁多人影相。兩人行埋一邊傾偈時，白只仲好體貼咁將自己隻暖杯畀女友。受訪時佢哋都好sweet，但就唔肯講點樣撻着，白只曾公開向電影拍檔春夏示愛，問佢同顏卓靈拍拖係之前定之後嘅事？白只冇正面回應，顏卓靈幫口話：「我愛春夏多過佢愛春夏。」
希望一生一世
提到顏卓靈爸爸顏慶進係酒樓集團主席，目前共有9間分店，之前傳顏爸爸嫌女兒前男友錢行係奀星而棒打鴛鴦，白只認真回答：「Uncle應該係用一種觀望嘅態度，我亦都……我都係認真，唔係玩嘢。」顏卓靈讚男友有才華、成熟兼搞笑，白只就話女友太多優點，唔夠時間講，最迷倒佢嘅係顏卓靈份人夠真誠、爽直同正氣，希望呢段關係係一生一世，視女友為結婚對象。
撰文：馮仁昭
