立法會家陣已經有位鼠王芬，遲啲可能多一個貓王岳，唔知會唔會喺立法會上演貓捉老鼠嘅一幕？話說公民黨新東立法會議員楊岳橋發現，大批師奶幫襯嘅大埔街市鼠患好嚴重，所以佢早前就實地去睇一睇，聽到有商戶話滅鼠唔係冇計，好似佢哋養咗貓之後就冇乜老鼠，但食環署講明唔畀街市養貓喎，岳少有見及此變身貓王，星期三約見食環署跟進。
養貓扣分 甚至要收檔
岳少同八方講，上月底訪問咗500幾位市民，發現六成幾人都話有需要改善大埔街市嘅衞生環境、尤其鼠患問題，竟然逾九成人話嗰度經常有老鼠出沒。岳少因此親自落街市睇過，有商戶反映鼠患問題一直有，但自從一、兩年前轉咗外判清潔商就嚴重咗，雖然佢哋都同食環署講過，食環亦嘗試解決，但作用唔大，惟有自己檔位自己救。
點救呢？唔使搵鼠王芬嘅，養隻貓咪得囉！但食環又講明唔畀街市養貓，否則扣分甚至收番個檔，商戶惟有靜雞雞養。有商戶就同岳少呻，如果啲貓周圍走、大小二便就話唔好箒，但商戶養貓養得好企理，重點係想防鼠患，加上老鼠對衞生嘅影響更大，覺得食環係咪可以放寬吓？
岳少都話街市嘅貓唔單止乾淨，仲好聽人話，幫手看舖㖭！連唔養貓嘅檔主都話，附近檔位養咗貓之後連佢個檔位都少咗老鼠。岳少話星期三見食環署助理署長時會跟進呢個問題。
李八方
mailto:[email protected]