民生書院噚日慶祝90周年，好多校友現身，當中包括中電（002）企業發展總裁莊偉茵（Quince），佢由幼稚園K1讀到中六，即係我哋家陣所講完成一條龍課程。唔講唔知，莊偉茵二哥同「魔童」王維基係同班同學兼波友，踢波踢到𠵱家。
Quince幾兄弟姐妹都讀民生，包括家姐、細妹同兩位哥哥。大佢兩年嘅二哥，同王維基係同班同學，所以佢細細個已經識得王維基，有一齊玩。佢爆料話，二哥同王維基由細踢波踢到大，畢業後工作各有各忙，仍然起碼一年返學校踢一次。
民生係名校，𠵱家好多家長都爭崩頭，想子女入讀到幼稚園，然後順利一條龍直升到中學，不過Quince就話當年，只係因為家住九龍城，父母為求方便，幫佢哋選擇行到返學嘅學校，一個細路入到，其他又入埋，方便接送。亦都係呢間學校，讓佢識到老公Adam。