巴西球星尼馬個爸爸日前自爆，西甲嘅皇家馬德里同法甲嘅巴黎聖日耳門都冇可能簽到佢個仔。點解佢講得咁肯定？皆因西班牙傳媒日前報道，將會喺今夏幫巴西出戰奧運、家陣正係喺里約熱內盧度假嘅尼馬，預計將會同巴塞隆拿續簽一份肥約，而且一簽仲會簽到2022年㖭；據了解，尼馬份新約入面仲有一項條款設下贖身費，金額仲高達2.3億歐元（約20億港元），睇怕應該會令皇家馬德里同巴黎聖日耳門打退堂鼓囉。