這天第六場四班1400米，雷神黑開有條路，撞正近期剋星羅理雅，結果他又搏輸，座騎「世界紀錄」做二奶，頭馬是羅理雅策騎、沈集成訓練的「快樂寶貝」，單Win及組合獨贏A1，分別派40.5及17元。
對上兩次賽事，羅理雅分別爆冷贏「小奇妙」及「金磚五國」，兩駒均是擊敗雷神座騎「喜悅繽紛」及「樂趣」，再加埋呢場「快樂寶貝」頸位氣走雷神所騎的後備補出馬「世界紀錄」，咁你話羅理雅係咪專剋住雷神。而雷神這天第四至六場「鑽之友」、「可愛寶」、「世界紀錄」均屈居亞軍，他仍未贏馬。
講番「快樂寶貝」，之前兩場跑田草1200米都近，羅理雅幫佢試準晒，呢次人馬合作改跑1400米，沿途前置跑主動，直路喺前面閂住身後之大熱門「好叻仔」，搞到後駒冇位上跑梗頸四，並力拒「世界紀錄」衝線勝出，羅理雅則連勝三次賽事。「快樂寶貝」之勝，亦正好為周一(27日)56歲生日之沈集成賀壽。不過有人歡喜有人愁，歌手許廷鏗跟家人及短裙索女入場為父親許義鏞的愛駒「勝利公爵」打氣，結果馬兒今場只得第九。
今場二至四名順序「世界紀錄」、「踏雪無痕」及「好叻仔」拎到，四重彩派兩萬蚊鬆啲，三T正獎冇人中，安慰獎中頭兩關可收6,636元。