上星期入紙申請主板上市嘅日本高爾夫球桿廠商本間高爾夫（Honma Golf），喺高球界相當有名，亦出名貴，打開golf嘅金融才俊知道佢上市都嘩嘩聲。翻閱佢本初步招股書，發現呢間公司真夠誠實，好似寫歷史咁，交代晒生意高低潮。
本間家族1959年創立公司，一直做球桿做到出晒名，招股書好老實咁話，公司銷售與營運喺1997年達致歷史高峯。咁之後呢？就係「衰落」囉。
原因係公司嘗試趁住日本樓價升，想發大嚟搞，買埋高爾夫球場同其他房地產。可惜同一時間，主業球桿銷售額下降，又因借錢買樓，所以導致債台高築，最後陷入財務困難，甚至要進入「民事再生計劃」，即係類似清盤、搵白武士營救咁。
之後，本間家族就失去大股東地位，亦要從日本JASDAQ交易所除牌。2009年，公司俾科瑞基金嘅劉建國相中，慢慢收購，直至2012年成為Honma全資擁有人。此後Honma就逐步重回正軌，家陣仲計劃上市，可謂邊度跌低，邊度起番身。
今次上市，復星（656）係上市前投資者，斥資4.7億元買7.5%股份，復星老闆郭廣昌可能係fans。