雷神莫雷拉這天唔知行咩衰運，搏親都輸，一直黑到第九場冇變過。
第九場三班1600米，雷神身穿昔日「加州萬里」那件經典綵衣，接手初騎東廐「加州再豫」，熱至2.0倍；反而佢棄騎的沈廐馬「曦世之寶」換上羅理雅卻變冷門，結果「曦世之寶」留到最後100米左右，於外欄如飛殺上，超越原本在內欄竄上走甩咗睇落贏得的「加州再豫」，「曦世之寶」爆出14倍冷Win，組合獨贏A3派31元。「加州再豫」輸頸位跑第二。
這天羅理雅連勝沈集成馬房第六場「快樂寶貝」及第九場「曦世之寶」，為周一(27日)56歲牛一的沈集成送上一份大賀禮。羅理雅近三戰取4Win，都係雷神屈居亞軍。雷神呢日截至此場，暫時跑咗四場第二加兩場第四，仲未贏到馬。
「曦世之寶」馬主李澄曜，賽後同老婆美女廚神Helen Tang一齊拉頭馬，兩公婆同沈集成一樣笑晒嘴。今場三、四名由「智者」及「領驫」順序瓜分，四重彩派一萬四千幾。