近年香港越嚟越多西環契仔同契女，個個都喺選舉為阿爺博到盡；律師會前會長何君堯都係急速冒起嘅「西環契仔」，區選砌低民主黨何俊仁，立會選舉料新西出戰。但佢喺有線電視節目《政壇單打》中卻話，呢個外號係「太高嘅名譽」，仲好認真咁話自己唔係邊個嘅「契仔」、冇「契親戚」，但承認「西環」嘅朋友認定佢嘅愛國本質，同時予以鼓勵喎！
唔認高院selfie有錯
除咗契仔背景，佢4月尾喺facebook上載於高院大樓內嘅selfie，涉嫌違法惹爭議，事件轉交警方處理，但事隔兩個月，何君堯仲未被追究，佢喺節目中堅稱事件有灰色地帶，唔認有錯噃，同場嘅社民連副主席黃浩銘即指佢犯咗法仲死撐，未做議員就自己修改同詮釋條例，「呢個好有趣，你（何）都幾有創意」。