身兼形象指導及歌手的馬天佑，日前應EVISU X Durex邀請到牛頭角為林雪及邵音音設計新形象。音音姐一見白白淨淨的馬天佑時表現勁嗒糖，頻頻摸面、掃心口、摸大髀甚至打pat pat，令馬天佑極度尷尬。之後馬天佑替林雪與邵音音大變身，但林雪對一身造型極不滿意，即場黑面及爆粗，當導演要求二人行catwalk，林雪再度不耐煩地爆粗說：「行乜X嘢！」擺明不滿被阻收工。
嚇到眼濕濕
玩完變裝後，導演要求林雪與邵音音教馬天佑演技，兩位前輩示範完一幕打情罵俏戲份後，由馬天佑與音音姐試戲，其間音音姐黐着馬天佑錫錫，但馬天佑表現抗拒不停迴避，氣得林雪扯火衝上前雙手大力拍向佈景板狂鬧馬天佑說：「X你係咪拍㗎！X你老X真係！有冇搞X錯，拍乜X嘢箒！」繼而㷫到手腳並用推冧佈景板說：「黐X線！點做戲㗎！拍一陣嘢咁X多人講。」全場登時鴉雀無聲，而被鬧爆的馬天佑更嚇到呆若木雞眼濕濕欲落淚。
此時，Kevin Boy（李健宏）突然現身，原來一切全是他網上整蠱節目《玩爆你個腎》策劃，與林雪和邵音音夾埋整蠱馬天佑。KB之後捉住馬天佑狂嘴耍冧，又讓林雪大力摑三巴掌幫馬天佑洩憤。馬天佑笑說：「我差啲喊㗎！」但揚言不會嬲怒。之後林雪又強調說：「其實我好唔啱，做一個演員唔好咁樣，呢個係完全錯嘅，做個真正演員係絕對唔可以遲到同發脾氣，邊有人咁㗎，黐線㗎咩，你（馬天佑）又相信嗰度大鑊喎！」
採訪：曹家誠
攝影：陳志嵐、沈健程
