英國公投決定脫歐，好多專家都話會對英超球會造成沉重打擊，冇咗歐盟球員身份嘅外援、英鎊勢貶值都令加盟英超嘅吸引力大減。不過亦有指呢次巨變會對南美球員投身英超有幫助，而據報曼聯就已經同皇家馬德里傾掂數，將會以5,000萬鎊（約5.3億港元）轉會費收購哥倫比亞中場占士洛迪古斯（J-Rod、圖）。
24歲嘅占士洛迪古斯，上季喺皇馬已經唔係必然正選，球季最後亦係最重要嘅比賽，歐聯決賽都冇機會上陣，所以占士希望可以轉投一支能夠保證有正選踢嘅球會。佢同紅魔新帥摩連奴都係用同一位經理人文迪斯，咁大家就更容易傾掂數。占士喺14年世盃決賽周之後，以5,600萬鎊由摩納哥轉投皇馬，今次轉會只要可以收番大部份成本，皇馬都願意放人。