香港「跳遠王子」陳銘泰早前分別喺瑞士同比利時兩站田徑賽奪金，噚日出戰喺將軍澳運動場舉行嘅香港城市田徑錦標賽首日比賽，最終喺男子跳遠造出8米11，雖然達唔到奧運標準，但都力壓共有12名嚟自南韓、關島等地嘅選手，再度奪金！
周六征泰再接再厲
阿泰噚日喺接近攝氏35度高溫下參賽，力爭跳入奧運標準8米15。初賽首次試跳，佢踩過踏板而犯規，不過喺第二跳就跳出8米11，比起自己喺五月造出嘅港績8米12米只差一厘米，可惜第三跳只得6米96。以首名晉身決賽嘅阿泰，喺第四同第五跳都失準，而最後一跳又犯規，最後以8米11封王。
阿泰賽後話好滿意成績，只係第二跳之後嘅節奏亂咗，繼而影響之後三跳嘅發揮。𠵱家同奧運只差三厘米，阿泰被注意多咗，佢就話唔多唔少都有啲壓力：「其實去到呢刻（跳出8米12）係超出預期，我本身只係諗今年要過八米，不過𠵱家當然博埋佢啦。」教練陳慧賢都大讚阿泰喺歐洲返嚟後表現唔錯。
阿泰周六就會出發到泰國出戰田徑錦標賽，係奧運前最後一個達標機會。目前阿泰嘅8米12排奧運第29位，喺奧運32個名額之內，但佢話呢段時間各地都仲有比賽，未到最後一刻都未知結果。
馬拉松奧運代表姚潔貞就喺女子5,000米跑出16分51秒06奪冠。另外，港隊跳高代表楊文蔚就跳出1.77米，力壓新加坡選手奪金。
