【本報訊】新盤經常有地產代理「拳王」上身街頭混戰，甚至「鬧客食屎」，為的只是開一張單。近10年地產界亦出過幾位無人不識的「街霸巨星」，本報綜合了他們的開單四式。
一、搏命式：代理有好多撈客方法，但在公路上截車撈客，完全是搵命博。這行有一名地產代理出名夠狂，曾經在東區走廊上截車撈客，據聞曾經因此而俾車撞過及被市民投訴。有人見過他突然跳出馬路，然後施展絕技「大字形」截停一部車，用身軀擋車，並上前向車主推銷樓盤。
呃內地客康城近火車站
二、劏客式：行內做一手樓有一個口訣，就是「即撈即簽」，代理為求即場簽單，劏客手段盡出，有些事情明知未必可能做到，就拍心口同客人講一定做到，最常見是承諾「包借包按」。「劉生，放心喎，銀行借九成按揭實冇問題」，但買家購入單位後，才發現銀行只借七成；另一種專劏內地客的手法，就是指鹿為馬。有人說，有次長實（1113）在紅磡置富都會商場賣將軍澳日出康城，有經紀竟然指住區內的都會軒同個內地客講，「呢度就係日出康城，你睇幾方便，隔籬就係火車站」。
三、肉搏式：平時在街上見到有代理撈客，他們通常都欠客底，惟有企街鬥撈，但競爭非常大，每當有新盤開售，售樓處一帶便集結幾百，甚至過千「街霸」爭客，每當有潛在買家出現，就所有人肉搏式衝埋去，鬥遞卡片及宣傳單張。但原來，他們在街上撈客都有自己一套行規，就是如果買家接了誰的卡片，該買家便屬該代理，其他人不得再死纏爛打，所以屢見爭客而打交。
四、兇客式：如果首三式都開不到單，經紀隨時出絕招，粗言穢語鬧客，希望「兇」到個客買樓賺佣。另一類「兇」客方法，最普遍就是營造熾熱搶購氣氛，令買家在神志不清下買樓，「嗱，呢個單位你唔買，後面大把人排隊買呀，快啲簽啦」。試過有客堅持唔買，經紀唔放個客走，逼到買為止。
不少市民對代理通街撈客極度反感，而地產代理監管局表示，因投訴人沒留下聯絡方法難以立案調查。
【市民對代理意見】
蘇同學：「認為（代理）好煩，試過一路跟住去到街尾，我唯有扮聽唔到，塞住耳機，試過黑面。」
鍾小姐：「好多人咁樣（塞傳單），唔係咁舒服！有時太過份，就覺騷擾。」
