金州勇士輸咗NBA決賽Game 7，好多朋友大為失望，連累埋左丁山都暫時士氣低落。香港人之中，好多好多去過三藩市灣區，有親友住灣區，因感情關係，梗係捧勇士，噓克里夫蘭騎士嘅啦，試問有幾多人去過、住過克里夫蘭喎。勇士輸波之後，加州老友若有所失，迷惘咗兩三日，包括上星期提過之美國朋友B先生在內。勒邦占士實在打得太好，唔止係占士大帝，直情係占士上帝，憑決賽最後三場表現，占士確立咗「偉大」球員嘅地位，堪與米高佐敦媲美，勇士嘅史提芬居里雖然係神射手，但打波EQ顯然有待磨鍊，目前只算係一個「卓越球員」，距離「偉大」之途尚遠。
B先生提及勇士隊贏NBA總冠軍之後，UA球衣球鞋銷路會更好，但如果輸波，球迷冇心機買新貨，UA冒起之勢，必然窒一窒步，因現在美國街舖商場零售業、百貨業不景，全靠網上購物支撐，品牌消費品要增加銷路嘅話，好倚賴突然性刺激，例如勇士奪得NBA冠軍，會有利UA，不利Nike，結果情況正是相反。B先生住在豪宅區，近年逐漸見到鄰居不斷有「亞馬遜」送貨上門，鄰居逐漸減少揸車去Macy（大百貨公司），就領會到網購霸權逐漸打倒連鎖店霸權、百貨公司霸權。
參加冼杞然終極勝利電影飯局之時，有人問起既然佢參與開辦過北京SOGO，現在大陸零售業前景如何？阿冼素來快人快語，佢話講好聽啲就係零售業進入調整期，難聽啲就係步入夕陽，日本郵船格。乜咁悲觀呀？阿冼話假貨充斥，阿里巴巴將整個中國商場地舖業打咗幾巴，現在人人網上購物，百貨公司變成「空城」，已成大趨勢咯。聽咗冼杞然講，左丁山醒起馬雲曾經豪言：二十年內如果我們不能打垮地產業，就是我們這一代的失敗。前幾日左丁山在某辦公室見到十幾包速遞貨品，一問之下，原來係毛巾，一包有七件不同晒士，由小到大，據講係100%埃及棉花，價錢便宜咁講。左丁山對一位OL話：「你仲駛去行百貨公司嘅？」OL答：「冇行好耐咯，上網就包搞掂。」如此發展下去，商場街舖零售業必走下坡，租金唔下跌有鬼，目前肉眼所見，時代廣場樓上幾層、太古廣場已經好靜，人羣熱鬧不再，只有幾個地區性商場仲係人逼人，譬如新城市、又一城、apm。渣打銀行分析指美國網上購物增長強勁，百貨公司零售額21年來持續向下（彭博網站報導），可見得冼杞然之言，同時在中國美國發生，地舖商場租金水平難以看好。