阿根廷球星美斯，被批評始終都及唔上馬勒當拿嘅球王地位，唔多唔少都係欠一個國際大賽冠軍；機會嚟喇，美斯！周日美洲盃決賽就會同智利上演決賽翻版戰。周三就係阿根廷86年世界盃八強淘汰英格蘭嘅30周年，阿根廷電視台就搵番「老馬」訪問，當然要重溫上帝之手同一個扭五個入波嘅經典，除咗回味往事，老馬就用激將法鼓勵一班師弟：「如果星期日仲捧唔到盃，你哋（阿根廷國家隊）就唔好回國嘞。」另外，周五就係美斯29歲生日，雖然備戰決賽期間唔會特別慶祝，佢老友兼隊友阿古路，就喺個人ig上載同美斯合照，祝佢生日快樂。
戴巴拿或來港鬥南華
另外，阿根廷教練馬天奴就率先公佈九名里約奧運名單，最出名係西甲馬體會前鋒安祖哥利亞，而意甲冠軍祖雲達斯嘅保羅戴巴拿就冇份，香港球迷可能最開心，因為保羅戴巴拿有機會跟祖記七月嚟香港友賽南華。