暑假到，港人自由行熱點台灣，唔少酒店推港人專享優惠住宿套餐，台灣觀光局香港辦事處主任巫宗霖同八方講，去台灣自由行嘅港客持續上升，消費亦越趨精明，所以台灣好多酒店為吸引港人暑假去玩，特別度身訂做優惠套餐，佢話唔止價錢物超所值，仲有增值服務，提供一系列適合港人嘅免費活動。
好似走年輕人路線嘅連鎖酒店捷絲旅，港人暑假入住唔只享46折，仲安排文青返到50年代台北民生社區，50年代屬美軍社區，過去吸引不少日本旅客來訪，𠵱家先逐漸多咗港人去，港人去嗰度可以飲咖啡，又可以去區入面嘅花坊，免費同花藝師DIY乾燥花手環或花束；親子家庭則安排去最近好旺場嘅宜蘭A版台東金城武大道踩單車或衝浪。
品味一族嘅港人亦有得揀，台北晶華同呢個月開幕嘅姊妹酒店礁溪晶泉丰旅，仲首次推出三日兩夜套餐，劈價36折，一個套餐玩兩地，夜空下喺罕有露天美人湯暢泳看星星。