香港呢輪發生好多事，一波未平一波又起。上星期泛民議員先至要求政務司司長林鄭月娥出席特別內會，回應一下銅鑼灣書店店長林榮基事件，點知今個星期就發生迷你倉四級大火。
噚日內會主席梁君彥就喺會上話，佢見過署理政務司司長，反映咗議員訴求，之但係署理司長話理解公眾關注林榮基件事，不過特首已經好詳細咁回應咗，加上立法會餘下會期唔多，林鄭又應承咗下個月11號出席討論鉛水事件嘅特別內會，所以傾林榮基事件嘅會就有待進一步商討。
立法會確係會期唔多，但需要傾嘅嘢就係需要傾，冇時間唔係原因咯。泛民會議召集人何秀蘭話，泛民亦都想向政府跟進大火嘅問題，所以希望立法會大會之後可以調番轉頭讓路畀內會開會。