今屆溫布頓網賽下周一開波，周四先有由WTA搞嘅賽前派對，一班女球手好似伊娃諾域、寶查同莎蓮娜等都盛裝出席，但東道主球手希花屈臣就着到古靈精怪，綠色膠短裙再加綠黃色格仔雨遮，唔知仲以為佢去參加dom dom派對囉。
今年溫網賽前派對，雖然冇咗因藥檢肥佬而被罰停賽嘅俄羅斯靚女球手舒拉寶娃，好彩仲有大把美女，依然睇頭十足。被傳同德國國家隊長舒韋恩史迪加訂咗婚嘅塞爾維亞球手伊娃諾域，以紅色跌膊長裙赴會，顯得佢高貴大方，仲令同樣着紅色晚裝嘅加拿大球手寶查同捷克球手姬維杜娃被比下去。至於細威雖然冇伊娃咁省鏡，但佢向來有品味，黑色上衫襯白色高叉半截裙，望落去好順眼自然。不過，英國球手希花屈臣嘅打扮就好唔掂，身上嗰件綠色皮短裙，膠味十足，望落成個MK妹咁，仲要擔埋把綠黃色格仔遮，真係唔知佢想點。不過溫網賽會周四宣佈，白俄羅斯球手艾莎倫嘉因膝頭受傷而被迫退出，亦係佢繼2013年後，第二次因膝傷而玩唔到溫網。
祖高域四強或撼費達拿
另外，溫網抽籤周五進行，衞冕嘅塞爾維亞一哥祖高域同七屆盟主費達拿有可能喺男單四強碰面，有主場之利嘅梅禮就同瑞士球手華域加同線。女單方面，力爭職業生涯第22個大滿貫女單錦標嘅細威，有機會喺八強對舊年美網四強贏過佢嘅雲絲。