英國噚日公投脫歐派勝出，令唔少立法會議員都大跌眼鏡，包括公民黨陳家洛、自由黨鍾國斌、商界廖長江等，不過亦有議員不知幾開心，因為佢哋都「受惠」於英國脫歐。
好似囡囡正喺英國讀中學嘅梁繼昌就話，英國脫歐令英鎊下跌，對佢唔多唔少有着數，「我個女喺英國讀書，我未買英鎊，𠵱家可以慢慢幫佢買囉。」佢仲話英鎊咁樣跌一跌，學費可以平一至兩成。
料跌至1,200鎊一呎
而有可能明年送囝囝到英國讀書嘅白鴿黨議員胡志偉亦話，現時英鎊大跌，嚟緊恐要入定多啲貨，又透露平日一直留意住英鎊價位，有好價就入。
至於一向喺英國有長期投資嘅自由黨田北俊，就同八方大講「掃貨經」，佢話脫歐後英鎊同英國樓價會下跌，笑笑口話又可以執平貨：「對我來講，𠵱家係大把平嘢執，要快啲去執平嘢！」又話佢以前喺英國買樓，要1,500鎊一呎，𠵱家可能跌至1,200鎊一呎，係入市良機，任何嘢都係有危就有機喎。
田少又話，相信脫歐唔會對香港經濟有大影響，佢個人一直都以為英國會留歐，因為過去一般投票都會傾向維持現狀，認為英國現時情況，同主張港獨人士差唔多，都係鼓吹保護主義。
雖然咁多議員都估唔中英國脫歐，但凡事總有例外，白鴿黨議員單仲偕上月同黨友李柱銘訪問歐盟時，就早已估計英國會脫歐。曾經為匯豐打工嘅單仲偕又話，由於2012年做議員時為避嫌，早已放晒啲匯豐股票，所以今次即使匯豐股價大跌，佢都冇乜損傷喎。
李八方
mailto:[email protected]