世界女排大獎賽香港站噚晚喺紅館開波，四隊當中三隊都係里約奧運代表，難得有奧運前哨戰睇，觀眾當然識貨坐爆場館啦。中國女排雖然有早前發燒嘅隊長惠若琪同曾春蕾冇上陣，但仍然強勢以3:0 K.O.奧運同組對手荷蘭響頭炮。
直落三局K.O.荷蘭
球迷最期待睇到中國嘅「可愛教主」惠若琪同曾春蕾，早前因扁桃腺發炎而發燒，噚晚賽前雖然有簡單熱身，但成場波齋企喺後備席冇落場。主教練郎平呢場安排咗19歲新星龔翔宇打正選，雖然佢身高只有1米86，一樣攔到唔少扣殺，表現好突出。
面對歐洲二線球隊荷蘭，中國首局中段俾對手連得五分，一度落後8:13，好在喺球迷熱情打氣下發力逆轉，先贏一局25:22。第二局中國越打越順，喺攻守兼備、身高接近兩米嘅袁心玥表現出色下以25:23贏多局。落後兩局嘅荷蘭第三局初段領先6:1，但中國重整旗鼓後扳平8:8，最後再反勝25:21，直落三局贏波。
郎平賽後話，今場因戰術問題收起惠若琪，唔係因為傷病缺陣；佢又話：「雙方都有好多來回球，荷蘭攻守都好精采。」至於世界排名第一嘅美國，頭場同樣以直落三局擊敗德國，後者今日會鬥中國（無綫翡翠及網絡電視13台今日1:15pm起直播）。