上星期日馬場稀客沙田陳太特登入馬場，話跟埋陳先生捧「一片光明」，希望可以中番啲四重彩，津貼吓佢張來回溫哥華機票喎，佢諗住中完馬就到會所凱旋廳吃父親節晚飯，跟住就由陳生送佢去機場搭夜機直飛溫哥華，住在家姐屋企，嘆番一個月。陳先生點可以放咁耐假吖，要留港返工㗎嘛。佢問到貼士，左丁山話：「好穩陣，世澤之星，一片光明雙膽，拖隨心隨意，無敵飛龍，迫擊炮，華美之友，兩膽四腳，複式膽仲穩陣，多數有錢收。」世界有咁容易就唔駛做啦，跑完之後，世澤之星跑第四，一片光明跑第八，兩大熱門瓜咗。前三名係華美之友，迫擊炮，無敵飛龍，左丁山及一眾老友包括沙田陳太等，無不輸到眼光光，第九場呢兩隻熱門甩拖，仲斷埋好多六環彩㖭。
跑馬就是這樣的，史卓豐上次騎一片光明，輕易取勝，呢次改騎「點解」，就撞一撞一片光明，令隻三歲馬仔亂咗腳步，真係冇乜好講。未跑完馬已從手機得知青馬大橋有嚴重交通意外，大嶼山出嚟嘅車龍長達兩三公里，好彩陳太係去機場，一路順風，但九點幾後過青馬大橋，發覺車龍出大嶼山仍未消散。就在起呢個時刻，收到財務W短訊，原來佢就被困在車龍之中，行不得也哥哥，佢係接機，車太太及細仔返香港島，困在馬路個幾兩個鐘頭。財務W有乜好怨呢，佢便大罵機場管理局疏懶兼無腦，七點幾嘅時候不在大堂發預警，在熒幕上通知駕車人士青馬大橋仍然擠塞不堪，如果預先知道嘅話，佢與不少人就會將架車放在停車場，改乘機鐵出香港啦。照計交通預警並非高難度科技，運輸署與機管局實在疏懶，愧對港人。
由此而想到，大嶼山與港九聯絡，只靠一條青馬大橋，一旦發生事故，大嶼山就成為孤島，機場交通癱瘓，幾得人驚㗎；接往屯門之另一條橋聽講會與港珠澳大橋同時啟用，即2018年，希望工程順風順水，再無阻滯啦！左丁山睇完短訊，打電話搵到塞車塞到噴火嘅財務W：「喂，架車郁唔郁得呀？」財務W答：「十幾分鐘未郁過半步，現在如螞蟻爬行。」左丁山潤吓佢：「咁要遵守規矩，停車熄匙，以免污染大嶼山空氣噃。」嘩，佢激到講粗口，氣溫30度之際，要停車熄匙？嘥幾多油都要開冷氣呀。講完玩笑，左丁山對財務W講：「這是制度的錯，無人需要負責，阿黃你明白未？」財務W回應：「當然明白，林鄭都講過，新界村屋僭建不能接受呀，現在邊有人再提！」