打工仔最關心強積金投資回報，政府噚日宣佈再度委任金管局總裁陳德霖愛妻陳唐芷青，繼續出任積金局行政總監，7月1日起計，任期兩年。
陳太做過政務官，2000年跟隨肥龍許仕仁過檔積金局，出任營運總監（機構事務），2003年做署理行政總監，2004年正式坐正，陳太已先後五度冧莊獲委任為積金局一姐，每次任期三年，今次卻有別以往安排，任期只得兩年。
有認識陳太嘅人士估計，陳太好大可能做多兩年就會告別積金局，之後好好享受人生，外傳同樣是政務官出身嘅積金局機構事務總監及執行董事鄭恩賜，會係接班人。積金局年報顯示，行政總監一職薪酬加獎金高達560多萬元，真係幾和味。