休息一日，香港「牛下女車神」李慧詩（Sarah、中）周六會繼續喺澳洲出戰墨爾本場地單車格蘭披治大獎賽，佢喺第二站會先玩爭先賽，之後一日轉戰凱林賽。Sarah喺周三展開嘅澳洲之旅首站，就已經連贏女子爭先賽同凱林賽雙金，分別喺爭先賽力壓東道主勁敵摩頓，以及凱林賽贏倫奧金牌得主美雅絲，成功展示喺中國集訓三個月嘅成果。距離奧運只有個幾月，Sarah將力爭喺里約奧運前最後一個比賽再下一城。而另一奧運代表刁小娟，亦會與隊友續戰全能賽。