立法會原本噚日搞Fun Day，等議員同記者可以玩番晚，不過籌委會主席梁君彥昨宣佈押後到下星期先搞。本身係Fun Day籌委會成員、會計界議員梁繼昌同八方講，原來前晚半夜有人提出，迷你倉大火仲燒緊，唔係好適宜呢個時候搞Fun Day，經商討後決定押後。
梁繼昌同八方講，前晚十點幾佢發現有人傳來訊息，話因為迷你倉大火仲燒緊，如果噚晚如期搞Fun Day唔係幾好，所以提出幾個方案，包括只係食飯唔玩遊戲，但都有人覺得呢個時間食飯、影相都唔係咁好，最後記者代表就同秘書處講，不如將Fun Day押後，佢同泛民代表聽到亦好同意，並即時通知籌委會主席梁君彥，不過梁君彥晚上11點幾似乎已瞓覺，結果昨早先回覆，最終同意延期舉行。
梁繼昌又話，自己為準備Fun Day搞到頭都暈埋，因為佢本來要唱歌，又要準備特備節目，更要做大會遊戲主持，仲煩過開會，𠵱家押後，起初都擔心Fun Day訂晒嘅食物唔知點處理，好彩餐廳話仲未煮，所以可以取消，仲將訂餐順延下周二Fun Day用。