喺外圍賽係10戰10勝嘅好領隊，嚟到首場分組賽變學神，第二場變番料事如神，第三場又做番學神，呢架輿論過山車快上快落，希望英格蘭領隊鶴臣（圖）仲未暈浪，可以喺下線嘅地獄淘汰賽頂住啦。
歐國盃第一場，英格蘭臨尾被俄羅斯逼和1:1，輿論插爆鶴臣，話佢換人廢，竟然用韋舒亞入替朗尼，真係「足球天才」！第二場，英格蘭反勝威爾斯2:1，輿論大讚鶴臣反應快，後備入替嘅占美華迪同史杜列治交到功課。第三場對斯洛伐克，鶴臣換咗六個正選，結果踢成0:0，賽後有記者問佢，話佢一次換六個正選有問題，廣泛傳媒都話佢輪換過度。彈完再讚又彈，輿論風向急變再急變，但萬變不離其宗嘅，就係幫球迷發聲或者出氣嘅一場論。你可以讚或踩鶴臣，但如果因為一場波或一個決定，就將一個球員或領隊捧到上天、或踩到落底，就未免太武斷。
不過，呢個就係一個浮誇先搶眼嘅時代，輿論容易走向極端，因為資訊太多，唔出位好難吸引注意。由傳媒到網民，成個文化都係咁，所以當一個球員一場波踢得差，即刻一沉百踩，被踩到變地底泥，而踢得好就會被捧到上天，不禁令人想起某啲媒體好鍾意起啲「天神下凡」嘅標題，後衞就一定係鐵衞，前鋒就一定叫神鋒。
仲記得之前有排安祖斯唐辛爆紅，入過兩腳世界波，英媒就捧到佢上天，但佢係咪真係咁勁？心中有數啦，但對於傳媒嚟講，唐辛勁唔勁係一回事，乘勢製造到輿論、掀起到熱潮、引起到討論、甚至至少引到人入去睇就夠。冇人追究當年英媒係咪捧得唐辛太高，因為佢好快被其他人淹沒；讀者已經J緊新嘅球星，唔得閒去翻舊賬。
文：咖喱