「贏在子宮裏」、「贏在射精前」呢期成為金句，有夫妻進行性行為前計準「子女」出生月份，好等佢哋生於1月，以「大女」、「大仔」優勢入名校、讀好書然後搵份前途無可限量嘅工作，「計好幾時射，就喺1月生。」但公民黨主席余若薇就以自己9月生為例，笑稱如果按照做「大女」（即年頭出世）先叫贏，佢應該輸咗。事實係咪呢？
「何謂輸贏？」
據說香港出名嘅幼稚園，專收1月出生嘅「大B」，搞到一班港媽連行房日子都計算埋，為咗仔女有薪高糧準嘅前途，真係「射」到盡。但查實呢個說法都俾唔少人質疑，包括公民黨主席余若薇，佢中英文兼擅、又係資深大律師，嫁咗個醫生老公，家住跑馬地，絕對滿足虎媽「贏」嘅標準，之但係佢出生於9月囉。
喺嘉諾撒聖方濟各書院同聖保羅男女中學名校讀過書嘅Audrey喺fb想當年，諗番自己當時嘅讀書年代，以及班中成績好嘅同學，都唔係「大女」喎！身為三女之母嘅Audrey亦話，三個女女讀同一間幼兒、幼稚園同小學，亦都充份證明唔係「大女」贏「細女」吖！
已經升呢做外婆嘅Audrey仲話呀，自己粒孫都係9月出世，但唔會覺得已經係輸定，拋低一句：「其實何謂輸贏？是成績？賺錢？幸福家庭？」係咪好發人深省？查實Audrey講咁多，擺埋自己上枱，無非係想叫虎媽唔使計較咁多，生於年尾嘅「細女」未必輸蝕過1月「大女」，似乎向一班虎媽嚟個當頭棒喝！
李八方
mailto:[email protected]